كل سنة وانت طيب يا خالد

27 يناير..عيد ميلاد الشهيد خالد سعيد..

كل سنه وانت طيب يا خالد..كل سنه واحنا فاكرينك..وكل سنه وانت في قلوبنا...

عقبال 1000 سنه ومصر تفضل فاكراك..

عيد ميلادك السنه اللي فاتت جه وانت مظلوم,,جه في عز الثوره..السنه دي جه بعد ما الحق ظهر,الناس عرفت انك مش بلطجي مش سوابق مش بتشرب بانجو وان السفاحين هما اللي قتلوك وان شاء الله عيد ميلادك ال31 هييجي وهما واخدين اعدام ..

كل سنه وانت طيب يا شهيد.. 

25 يناير 2012 العيد اللي لسا مبقاش عيد

تنويه: دي مش تدوينه هادفه لأي شيء..دي بتحكي مشاعري وبس :))

يوم كان كإنه عيد بس عيد مش سعيد خالص!..

قبلها بيوم مكنش جايلي نوم زي زمان وانا صغيره في ليلة العيد..كان يوم فظيع..مسيرات..وتحرير مليان..وناس بتهتف وصوت عالي وازعاج...

حصل كل ده في أيام تانيه كتير بس ده كان يوم مختلف بالنسبة لي لان انا مكنتش متخيله الأعداد دي خالص كنت فاكره ان اغلب اللي في البيوت خلاص كرهو الثوره..

كان نفسي يبقى يوم سعيد واحتفال بنجاح الثوره ويبقى مليان سعاده وامل قد اللي كانو موجودين في 11 فبراير واكتر..

بس هو مكنش كده للأسف لاننا مجبناش حق الشهدا..المجلس لسا بيحكم..الثوره مكملتش بكل ما تحمله الكلمه من معنى..الخ..

وده ميمنعش ان الاعداد كانت تدي أمل لأي متشائم..

كنت مبسوطه ان بقى في ناس عندها استعداد تسمع وتعرف في ايه..ناس مع او ضد المجلس العسكري مش مهم اهم حاجه عندي انهم وصلو لقرار انهم يطلبو تسليم السلطه..

ناس نازله تعتصم أو تتظاهر أو حتى تحتفل كلهم او اغلبهم كانو مع رأي الثوار ان السلطه لازم تتسلم مع اختلاف الطريقه اللي مقتنع بيها كل واحد..

يمكن دي حاجه عاديه عند ناس كتير او مش فارقه معاهم بس انا بجد مؤمنه ان لو البيوت كلها بقت كنب وفلول يبقى الثوره صعب اوي انها تكمل ودي حاجه بترعبني فكوني اشوف المشاهد دي ده بالنسبه ليا نور في طريق كله ضلمه..

عندي امل ان 25 يناير 2013 هيبقى احسن وهيبقى عيد بجد هيبقى عندنا رئيس وهنحاكم القتله وهنجيب حق كل اللي ماتو من اللي قتلوهم بما فيهم المشي..والناس هتبقى سعيده بجد..معرفش ازاي ممكن ده يحصل,بس عندي أمــل..

وفي الآخر دي مش تدوينه ثوريه ولا نثر ولا مقاله ولا أي حاجه من دي خالص..ده مجرد كلام كان جوايا وطلع :) :)

اخي الكنبه!

اخي الكنبه انا لست مادة غذائية في متجر اطعمه!!!!

لو كنت جبنه تحطني جمب الجبنه في التلاجه..

ولو كنت لحمة تحطني في الفريزر..

ولو كنت طماطم تحطني مكان الخضار..

مش من حقك تخنقني وتحطني في المربع اللي انت شايفني فيه..

مش شرط لو انا متدين ابقى اخوان..ولو عندي دقن ابقى سلفي..ولو شعري طويل ابقى ليبرالي..ولو شكلي شاب وبنزل الشارع ابقى 6 ابريل..ولو شاب بشتغل سياسه من زمان شويه ابقى من كفايه...ولو ضد الجيش ابقى عميل...ولو مع الثوره ابقى بردعاوي..ولو قلت لا في الاستفتاء ابقى علماني..ولو نعم ابقى اخوان..

والرغي ده!.

مع احترامي لجميع الاطياف والناس..بس مش من حقك تصنفني بمزاجك تصنيف غلط على اساس اي اختيار اختاره..

التصنيفات دي غير ان ملهاش اي اساس من الصحه هي كمان مؤذية..

جرب تسمعني لما اكلمك وافتح ودانك ومتسمعش من هنا وتطلع من النحيه التانيه..شوف انا كده ليه او اختياري ده عشان ايه يمكن يعجبك ويمكن تقتنع بيه وبعد كده بقى طلعت من الجماعه او الحركه اللي انت صنفتني منها او مطلعتش مش هتفرق معاك..

ادي نفسك واديني فرصه عشان نفهم بعض...

لو انت فعلا بتحب الاستقرار فالاستقرار مش هييجي غير بالحوار وعدم الاصرار على رأي خصوصا اذا كان غلط..