فضلت كتير مش عارفه اكتب التدوينه دي لاني كنت ناويه ان بعد تدوينة 27 يناير عن عيد ميلاد خالد سعيد اكتب دي عن ابطال 28 يناير ولو حتى كتبت فيها سطرين..ده ايمان داخلي ان ده حق عليا..ايمان ان انا لازم اعمل كده..اتأخرت 3 ايام في كتابتها لاسباب متعلقة باللابتوب بتاعي لحد يوم 1 فبراير كان لازم اكتبها عشان اكتب واحده تانيه بكره يوم 2 فبراير عن شهدا تانيين..شهداء موقعة الجمل!!! كان عندي احساس فظيع انه ايه ده ازاي كل دول ماتوا؟!! وقبل ما اكتبها لقيت ناس بتموت وناس بتعيط والدنيا مقلوبه..عدد ساعات قليل جدا مات ناس كتير جدا..ناس مكانتش رايحه تحارب ولا تسقط نظام بقى وكلام من ده..دي ناس كانت رايحه تشجع في ماتش كوره!! شباب واطفال!! بيتقتلوا بأبشع الطرق..مش هاكتب حاجه عن الأحداث ولا عن الطرق اللي الناس ماتت بيها لإن كل الناس عرفت ده خلاص..بس انا فعلا غير تأثير أعمارهم والطرق اللي اتقتلو بيها عليا..أثر فيا ان بعد سنه كامله على ثوره كنت شايفاها هي المنقذ الوحيد لينا الناس لسا بتموت..اثر فيا ان انا مش عارفه اكتب عن مين ولا مين..ازعل على مين ولا مين..كنت فاكره يوم 11 فبراير اللي فات ان اللي حصل في ال18 يوم من قتل هيبقى اخر قتل واخر اهانه..لقيت مينا بيموت ومعاه شهداء قد كده شهداء ماسبيرو..لقيت عصام علي بيموت من التعذيب..لقيت شهداء محمد محمود1..شهداء مجلس الوزراء..شهداء محمد محمود2!! ده غير فض الاعتصامات وغيرها وغيرها..واخيرا شهداء احداث بورسعيد..
حتى "يا نجيب حقهم يا نموت زيهم" بقى هتاف صعب لانهم بيكتروا ربنا يقدرنا ونجيب حقهم بجد بدل ما احنا بس بنموت زيهم..
اختلفت الطرق والحكومات ومبارك والموت واحد..
الناس بتموت... الدم مغرق مصر في كل مكان الناس بتموت..من اهم اسباب سقوط مبارك قتل الداخليه لخلق الله في الشوارع..والناس لسا بتتقتل..جيش داخليه بلطجيه مش هتفرق..المهم ان الناس بتموت..مفيش حاجه في النظام اتغيرت من يوم 11 فبراير..لسا مفهموش اننا مش هنسكت على حقوقنا..خدوها كلها مننا حتى ابسط حق..حقنا في الحياه!!
اللي اعرفه اننا نستاهل احسن من كده بكتير..منستاهلش من النظام يموتنا..منستاهلش من الشعب يخونا..منستاهلش من القوى السياسية تبيعنا..
يــــــا شــهــداء مـــــصــــر..ربــنــا يرحمـكـوا كـلكـوا..
الثورة مستمرة...الثوة بإذن الله ستنتصر..
ليست هناك تعليقات:
إرسال تعليق