لما دخلت الرصاصة في صدري..
كان كل همي تكملو اللي مت عشانو بدري..
تجيبو حقي وحقكوا في العيشة والحرية..
تجيبو حق بلدنا انها تكون قوية..
قلت عادي جدا لما أموت..
عشان العيش نلاقيه في كل البيوت..
ياما احلى اني أموت شهيد..
عشان ارسم لبلدي مستقبل جديد..
سبت أهلي وبلدي واللي كان..
رحت مكان كنت بحلم بيه من زمان..
استنيت كل اللي مت عشانو يحصل..
ومفيش حاجه حصلت كأني مت عشان بس يرحل..
شويه ولقيت منكو كتير بييجوا عندي..
ماتو هما كمان مقتولين فدى بلدي..
قلتلهم مين قتلكو هي البلد متصلحتش..
قالولي الدنيا بقت أسوأ والثورة مكملتش..
قلتلهم يعني عمري اللي راح راح هدر..
قالولي لا متخافش لسا في مية مليون بطل..
هيحاربو كل ظالم ويجيبو حقنا..
هيكملو ثورتنا ومشوارنا ويحققوا حلمنا..
قالو عنكوا كلام جميل قالوا عنكو مبتخافوش..
فبعتلكوا كلامي ده علشان حقي متنسهوش..
خليكو ضد كل قمع وظلم وقهر متتعبوش..
وغير كلمة الحق والعدل متسمعوش..
ليست هناك تعليقات:
إرسال تعليق